जय हनुमान नावडे क्रिकेट क्लब आयोजित 'आमदार चषक २०२३' किताबचा दापोली जय हनुमान क्रिकेट संघ ठरला मानकरी

पनवेल(प्रतिनिधी) नावडे येथील जय हनुमान क्रिकेट क्लबच्या वतीने आयोजित करण्यात आलेल्या 'आमदार चषक २०२३' टेनिस क्रिकेट स्पर्धेत दापोलीच्या जय हनुमान क्रिकेट संघाने प्रथम क्रमांक तर किरवलीच्या ओम नर्मदेश्वर संघाने द्वितीय क्रमांक पटकाविला.

नावडे येथील मैदानावर चार दिवस या स्पर्धा पार पडल्या. उत्तम आयोजन आणि क्रिकेटचा थरार या स्पर्धेदरम्यान क्रीडा रसिकांना पहायला मिळाला. या स्पर्धेला पनवेल महानगरपालिकेचे माजी सभागृहनेते परेश ठाकूर यांनी सदिच्छा भेट दिली. यावेळी भारतीय संघातील आंतरराष्ट्रीय माजी क्रिकेटपटू व आयपीएल प्रशिक्षक संजय बांगर यांची विशेष उपस्थिती लाभली.

या स्पर्धेत विजेत्या ठरलेल्या जय हनुमान दापोली संघास ०१ लाख रुपये व आकर्षक चषक, उपविजेता किरवलीच्या ओम नर्मदेश्वर संघास ५० हजार रुपये व चषक, तसेच तृतीय क्रमांक पटकाविणाऱ्या गावदेवी खार्डी संघाला आणि चतुर्थ क्रमांक मिळविलेल्या दक्षता ११ कानपोली संघाला प्रत्येकी २५ हजार रुपये व आकर्षक चषक देऊन सन्मानित करण्यात आले. स्पर्धेत मालिकावीर होण्याचा मान ओम नर्मदेश्वर संघाच्या मंगेश पाटील या अष्टपैलू खेळाडूने पटकाविला. त्याला रेफ्रिजिरेटर बक्षिस देऊन गौरविण्यात आले. स्पर्धा यशस्वी करण्यासाठी स्पर्धेचे आयोजक व प्रसिद्ध क्रिकेटपटू प्रशांत खानावकर आणि आयोजक सहकाऱ्यांनी विशेष मेहनत घेतली.