नवी मुंबई महानगरपालिका मुख्यालयात आयुक्त डॉ.कैलास शिंदे यांच्या शुभहस्ते ध्वजारोहण संपन्न
*मुख्यालयाच्या तिरंगी रंगातील आकर्षक रोषणाईसोबत नागरिकांमध्ये सेल्फीचे आकर्षण*
*’घरोघरी तिरंगा’ अभियानाच्या तिरंगा सेल्फी पॉईंटवर छायाचित्रासाठी आणि तिरंगा कॅनव्हासवर स्वाक्षरीसाठी उत्साह*
भारताच्या 78 व्या स्वातंत्र्यदिनानिमित्त आयकॉनिक वास्तू म्हणून नावाजल्या जाणा-या नवी मुंबई महानगरपालिका मुख्यालय इमारतीच्या प्रांगणात महापालिका आयुक्त डॉ.कैलास शिंदे यांच्या शुभहस्ते ध्वजारोहण संपन्न झाले. याप्रसंगी अतिरिक्त आयुक्त श्री.सुनिल पवार, अतिरिक्त आयुक्त तथा शहर अभियंता श्री.शिरीष आरदवाड, प्रशासन विभागाचे उपआयुक्त श्री.शरद पवार यांच्यासह विभागप्रमुख, अधिकारी, कर्मचारीवृंद तसेच लोकप्रतिनिधी व नागरिक मोठ्या संख्येने उपस्थित होते. पोलीस, अग्निशमन जवान व महाराष्ट्र सुरक्षा बलाचे सुरक्षारक्षक यांच्या पथकांची यावेळी लक्षणीय उपस्थिती होती.
मुख्यालयाच्या अंतर्गत दर्शनी भागात काढलेली आकर्षक रांगोळी आणि ‘घरोघरी तिरंगा’ अभियानाच्या ठेवलेल्या तिरंगा झेंड्याच्या सेल्फी पॉईंटसोबत अनेक नागरिकांनी छायाचित्रे काढली. तसेच तिरंगा कॅनव्हासवर आपली स्वाक्षरी करून ‘घरोघरी तिरंगा’ अभियानात आपला सहभाग नोंदविला.
नमुंमपा मुख्यालय इमारतीला 13 तारखेपासून नयनरम्य तिरंगी विद्युत रोषणाई करण्यात आलेली असून यामुळे भव्यतम मुख्यालय इमारतीच्या आकर्षणात भर पडलेली आहे. नागरिक मोठ्या संख्येने मित्र, परिवारासह एकत्र येऊन रात्री तिरंगी झळाळी असलेल्या मुख्यालय वास्तुसोबत उत्साहाने छायाचित्रे काढताना दिसत आहेत. 16 ऑगस्टपर्यंत ही विद्युत रोषणाई बघता येणार आहे.
याशिवाय पावसाळी कालावधीत फडकविला न जाणारा मुख्यालय इमारती समोरील 225 फूट उंच व भव्यतम स्वरूपातील प्रतिकात्मक राष्ट्रध्वज हा स्वातंत्र्यदिनाचे औचित्य साधून ‘घरोघरी तिरंगा’ मोहीमेच्या अनुषंगाने फडकविण्यात आला असून हे देखील नागरिकांचे विलक्षण आकर्षण आहे. त्यामुळे नागरिक मोठ्या संख्येने या परिसराला भेट देत राष्ट्रप्रेम जागवित आहेत. एवढेच नव्हे तर या रस्त्याने प्रवास करणारे अनेकजण याठिकाणी थांबून उंच राष्ट्रध्वज व भव्य मुख्यालय इमारत तसेच रात्री तिरंगी रंगात उजळून निघालेल्या मुख्यालयासोबत सेल्फी व छायाचित्रे काढताना दिसत आहेत.
